صفحة بال مون على الموقع التواصل الاجتماعي فيسبوك

العودة   منتديات بال مون > منتدى الفن والأدب > منتدى روايات عبير وأحلام > روايات المنتديات

روايات المنتديات روايات قلوب أحلام - روايات عبير الأحلام - روايات قلوب ملاذنا - روايات رومانسية مترجمة






الرجاء استخدام خاصية البحث أدناه للبحث في الموقع:









إضافة رد
 
أدوات الموضوع إبحث في الموضوع انواع عرض الموضوع
  #1  
قديم 18-05-2013, 01:08 PM
الصورة الرمزية صمت المشاعر
:: عضو مميز ::
______________
View صمت المشاعر's Photo Album  صمت المشاعر غير متواجد حالياً
 
أطياف الغرام / الكاتبة : معاميريا ; كاملة




قصة روعه قريتها و حبيت انقلها لكم


اتمنى تنال إعجابكم


و اتمنى تفاعلكم معي



اخليكم مع القصة






السلام عليكم


صباح الخير



هذه هي المرة الاولى التي اشارك فيها


قد اكون جديده على المنتدى لكن المنتدى ليس جديد علي


وهذا ما دفعني لاغامر بوضع تجربتي الاولى هنا


واتمنى ان الاقي الدعم منكم




اراودتني فكرة ان اكتب قصه ولا اعرف اهي فكرة حمقاء ام مغامرة سخيفه ولكني اتمنى ان تكون تجربه ((لن اقول رائعه ولكني اتمنى ان تكون ناجحه))


وانتم من سيحدد ان كان على المواصله ام ترك الميدان لفرسانه




الجزء الاول



((زواج اجباري))




ضايق خلقي واحس ان جو الغرفه طابق على صدري وخاطري اصيح من قلب لكن القهر ان حتى دموعي رافضه تريحني وتغسل همي ااااااااااااااااااااااااااااااااااه خاطري اصرخ وطلع كل الي في قلبي لكن هذي نعمه انا محرومه منها لاني لو صرخت كل الي بحصله هوشه محترمه ومحاضره عن ان البنت المحترمه لازم ما يطلع صوتها لبرى غير انهم اذا سألوني عن السبب بيستسخفونه وبيقولون ما عندش سالفه


وانا غرقانه في همي وسرحانه في المصيبه اللي حلت علي سمعت صوت طق على باب الغرفه



...... :- علياء ، علياء بطلي الباب يلا عاد صار لي ساعة على الباب بسرعه قبل ما يمر واحد من خوالش


وتعض على ضروسها وتقول :-علياء ووجع بسرعه بطلي الباب


قمت بالغصب من مكاني ورحت بطلت الباب ورجعت مكاني من غير ما التفت لها


..... :- تعالي هنا وش فيش ؟ وش صاير؟ ولا تقولين ما فيش شي


علياء :- ولش لازم يكون في شي وثانيا وش جابش هالحزه(هالوقت)


........ :-موبايلش مقفلتنه وقافله عليش حجرتش وقاعدة بين الكبت والسرير وشكلش يقول لا حد يكلمني ...كل هذي اعراض ان في شي خطير صاير ... وتغمز بعينها .... اما عن اللي جايبني يابنتي اليوم خالتي بتجينا على العشا وبما ان اقرب طريق لقلب الرجل معدته قلت اخذ وصفه الحلاوه الي تسوينها



علياء :- هجور اخذي دفتر الطبخ ويلا انقلعي برى


طبعا ما قلت لكم من هذي هذي هاجر بنت جيرانا صديقتي الروح بالروح من قبل حتى ما ندخل المدرسه والعجيب ان ما في وجه شبه بينا بالعكس نختلف في كل شي هاجر قصيره وخمريه شعرها اسود فاحم وناعم وكل يوم والثاني قاصته قصه شكل تكره الشعر الطويل جسمها مدور لاهي متينه ولا ضعيفه ما تحب المدرسه والدراسه ما صدقت خلصت ثانويه وقعدت في البيت ما رضت تدخل الجامعه تحب الهذره ملقوفه تبي تعرف كل شي اجتماعيه لها معارف وصديقات وش كثر صريحه ما تهتم اذا ما عجبش رايهاو سرش وياها في بير عميق


هاجر عيلتها كبيره وهي اخر العنقود عندها خمس خوات كلهم متزوجات واربع اخوان بعد متزوجين وساكنين بعيد عنهم ما عدا سالم اكبر من هاجر باربع سنوات عمره24 سنه وسالم هذا واحد مغازلجي درجه اولى المهم ما علينا منه



هاجر تربعت على السرير مقابلتني والدفتر في حضنها : شوفي عاد طلعه من اهني ما في قبل ما اعرف وش السالفه


رديت عليها من غير نفس: هجور ما ابي اتكلم اللحين السالفه طويله واذا قعدنا على السوالف ما بتلحقين تطبخين لحبيب القلب مازولا


هاجر وهي تحط يدها على قلبها وتسبل بعيونها وتتنهد :- ااااااااااااااااااااه واخيرا بشوف حمودي بس ولو ما اطلع قبل ما اعرف واذا على حمودي ترى بيقعد شهررررررررررر


واذا ما طبخت له اليوم بطبخ بكره



حمد هذا يصير ولد خاله هاجر يدرس في مصر قانون ولانهم ناس على قد حالهم فما ينزل البحرين الا في اجازة نهايه السنه



ما ادري ليش من تجيب هاجر سالفه حمد يتغير مزاجي يمكن لانه الموضوع الوحيد اللي اقدر استفزها به:- ايه هانت كلها سنه وبيقعد على قلبش على طول لين تملين منه


ما عطتني وجه وحاسه بوزها على صوب فقلت علشان اقهرها


:-هجور يعني حمد عقب سنه بيرجع محامي تتوقعين انه بيرضى يتزوج وحده ما عندها الا شهاده ثانويه


شهقت هاجر وفتحت عيونها على كبرهم:- اصلا يحصل له هاجر بنت جاسم ترضى فيه واذا على الشهاده انتي تدرين ان ما دخلت الجامعه لاني ما احب الدراسه رغم ان نسبتي تدخلني


وثانيا وش فايدة الشهادة واخرتها محد بيرضى اني اشتغل



ضحكت عليها :-هههههههههههههه زين زين لاتاكليني تدرين اني احب اشوفش معصبه



هاجر حطت ايدها على خصرها وتطالعني بنص عين :- لا والله ترى عطيتش وجه وتعالي اهني وش سالفتش



نزلت راسي لحضني وانا العب باظافيري :- هجور انا بتزوج


هاجر وقفت على طولها فوق السرير : لااااااااااااااااااا احلفي الف الصلاة والسلام عليك يا حبيب الله محمد كلللللللللللللللللللللللللللللللللللللوش


اشرت عليها بيدي انها تقعدوباليد الثانيه انها تكتم الصوت :- وش فيش استخفيتين قعدي لا بارك الله في ابليسش اللحين جدي يسمعش ويجي يهزئنا



حطت ايدها على فمها بمعنى سكت وهالمره نزلت عن السرير وقعدت على الارض قبالي


زين بتتزوجين ليش هالاكتئاب



تنهدت تنهيده من قلب وتاملت هاجر ونزلت دموعي اللي كانت محبوسه في صدري يمكن لاني شفت الاهتمام في عيون هاجر


حضنتني هاجر ومسحت على راسي بحنيه وقالت:-علياء حبيبتي لا تصيحين تدرين ان دموعش تعور قلبي بعدين انتين تبين تعقديني تراش اذا صحتين تخرعين



بعدت روحي من حظنها ودزيتها على ورى وقلت وانا امسح دموعي :- من الغيره لاني احلى منش


هاجر :- ماعلينا من خزعبلاتش المهم ابي اعرف انتين ليش بدل ما تفرحين انش بتتزوجين قاعدة تصيحين



قلت لها وانا محتاجه اني اتكلم مع احد يفهمني ويحس فيني :- لانه زواج بالاجبار لاني ما ابي العريس ولا حتى اهله


هاجر وشدها الموضوع قربت لي اكثر وقالت بصوت واطي :- ليش من هالعريس وليش بالاجبار ؟؟؟؟؟؟؟؟؟؟؟؟؟؟؟؟؟؟؟؟؟؟




هذي مقدمه للقصه وان شاء الله تعجبكم وانا في انتظار ردودكم


علشان اشوف تستاهل اكمل او لا



اعذب وارق التحايا


أطياف


 
 
رد مع اقتباس
 
 
   
  #2  
قديم 18-05-2013, 01:09 PM
الصورة الرمزية صمت المشاعر
:: عضو مميز ::
______________
View صمت المشاعر's Photo Album  صمت المشاعر غير متواجد حالياً
 
أطياف الغرام / الكاتبة : معاميريا ; كاملة







هـــــــــــاجــــــــــر



الصراحه استغربت وحده في هالزمن تتزوج غصب ومو أي وحده هذي علياء


ايه صح انتو ما تعرفون علياء عليا ء بنت طويله بالنسبه لي لاني قصيرة بس هي طولها حلو رشيقه عليها جسم يهبل وبيضاء شعرها بني فاتح ناعم وطويل يوصل الى اخر ظهرها وكثيف احلى ما فيها عيونها وساع ورموشها كثيفه وطويله عيونها عسليه وخشمها طويل وحلو وفمها صغير وشفايفها ممتليه خدودها وشفايفها على طول ورديه ذكيه كانت الاولى على الدفعه حاليا تدرس في الجامعه سنه ثانيه تخصص تارخ (وع ما احبه) هادئه مالها اصدقاء واجد او بالاصح ما لها الاانا والباقي مجرد زميلات ما تحب تهذر واجد ومن الصعب انها تعبر عن مشاعرها يمكن السبب انها تربت على يدجدها بعيد عن امها وابوها


اكيد خطر على بالكم انها يتيمه لا امها وابوها عايشين بس كل واحد لاهي بحياته عنها


علياء الله رزق جدها خلفته صبيان وبنت وحده اللي هي ام علياء وكانت جميله جدا ومدلله لانها اخر العنقود والوحيده بين ثلاث صبيان لمن صار عمر ام علياء 18 سنه تزوجت من واحد سعودي متزوج اسمه يوسف بن سلمان عاشت معاه ام علياء خمس سنوات كانت كلها مشاكل تطلقت عقبها وردت البحرين وعلياء عمرها سنه ونص في البدايه ابو علياء ترك علياء عند امها لين تكمل السنتين ولمن جاء علشان ياخذها امها عارضت ولولا تدخل جدها كان وصلت المسأله للمحاكم ورجع ابو طلال( ابو علياء)للسعوديه وانشغل بعياله وزوجته وما كان بينه وبين علياء أي نوع من الاتصال غير انه يطرش لها فلوس كل شهروبعض الزيارات الخاطفه في الاعياد اما امها تزوجت وعمر علياء 6 سنوات وتركت علياء عند ابوها وامها اللي ماتت عقب زواج بنتها بسنه ومن تزوجت وعلياء ما تشوف امها الا في المناسبات يا دوب تقعد خمس دقايق وتطلع وحجتها انشغالها بعيالها وزوجها



جد علياء فعلا رجال كبير وشديد وربى علياء على السنع والاخلاق الحلوه ورباها احسن مما ربى امها وصحيح انه شديد وما يقبل احد يناقشه في امر هو مقتنع فيه بس مع ذلك ما توصل انه يجبر علياء على الزواج وعلياء اساسا يمكن تكون الوحيده اللي تعرف شلون توصل رايها لجدها وتقنعه علشان جذي قلت لها



هاجر :- علياء انتين اكيد تمزحين يعني من هذا اللي بيجبرش جدش انش تتزوجينه



رفعت علياء راسها وقالت :- امزح ياليت امزح مو انتين لو تعرفين من العريس كان ما قلتين اني امزح العريس يا طويله العمر اسمه خالد بن مشعل بن سلمان



حكيت راسي وهزيت كتوفي وقلت :- خير يا طير من يعني هالخالد



علياء:- هذا يا طويله العمر وقصيرة القامه يصير ولد عمي امس جا ابوي وعمي يخطبوني من جدي او بالاصح يقولون لجدي انهم خطبوني لولد عمي



طالعتها باستغراب :- زين وبعدين صراحه للحين ما فهمت ليش رافضته ولا تقولين لانش بتروحين السعوديه ترى في الاول والاخير انتي سعوديه وبعدين من بعدها السعوديه يعني



علياء بغضب تضغط على ضروسها وتدز راسي بيدها :- انا ابي اعرف انتين شلون تفكرين والقهر انا اقول محد يفهمني كثر هاجر وفي الاخير يطلع كلامش نفس كلام خالي محمد بالظبط



قلت لها وانا افرك راسي مكان يدها :- زيييييييييييييييين لا دزين وفهميني يا حكيمه زمانش



علياء شبكت اياديها مع بعض وحطتها على شفتها وبعديتن قالت :- خايفه يا هاجر خايفه


تدرين انا اذا تزوجته بدخل عالم ثاني غريب ومختلف


تعرفين احنا ناس على قد حالنا وهم ناس اغنياء يعني شلون بتصرف شلون بتعامل وياهم غير اني ما اعرف اذا بيتقبلوني او لا



قاطعتها :- علياء وش هالكلام ترفضين واحد لانه غني !!!!!!!!!! واكيد بتقبلونش لانهم لو ما يبونش ما خطبوش لولدهم



علياء: انا ما قلت اني رافضه لانه غني انا قلت انه شي يخوف انتين تعرفين ان امي وافقت تتزوج من ابوي بس لانه غني ووسيم ورغم غناه ما قدرت تعيش معاه بعيد عن اهلها


فشلون انا اللي ما عندي أي مبرر لقبول هالشخص وثانيا انا خايفه انهم ينظرون لي على اساس ان البنت مثل امها



هاجر وباندفاع ومن غير تفكير:- امش ما تطلقت لانها بعيده عن اهلها امش تطلقت لان ابوش ما صار مثل الخاتم في صبعها ولا نه ما طاعها وما رضى يطلق بنت عمه ولمن عرف انها تزوجته طمع في فلوسه طلقها ولو هم ينظرون لش انش مثل امش ما خطبوش



الصراحه ندمت اني تسرعت وقلت لها هالكلام بس مشكلتي ان اللي في قلبي على لساني وما اعرف اجامل



علياء والعبره خانقتها :- ادري ما يحتاج تذكريني بس انتين تعرفين انهم ما كانو يحبون امي وكانو يعاملونها على اساس انها اقل منهم واخاف انهم يعاملوني بنفس الطريقه



هاجر وهي تتافف وترفع ايدها بالدعاء :- يا رب ارحمني من غباء هالبنت يا بنتي اسمعيني زين اولا الكلام اللي انتين قاعده تقولينه مصدره امش يعني مو اكيد ولو فرضنا انه صحيح بقول لش من حقهم وحده وتزوجت على بنتهم شلون تبين يعاملونها يعني انا مثلا اكيد بحتقر أي وحده تتزوج ابوي او زوج خالتي او عمتي فشلون لو عرفنا انها ما تزوجته الا لفلوسه


وثانيا انتين بنتهم مو غريبه واذا ابوش غني يعني انتين غنيه


وتعالي اهني لو كلامش صحيح وش اللي يخليهم يخطبونش يعني ما في شي يجبرهم




علياء وهي تفكر في كلام هاجر وسرحانه فيه :- هذا اللي محيرني ماني شايفه سبب مقنع مرات اقول ابوي يبيني اعيش جنبه بس ارد واقول لو يبيني يكفي انه ياخذني ما يحتاج يزوجني ولد اخوه



هاجر بتفكير :- ولد عمش شافش؟



علياء :- صدق انش خبله شلون يعني شافني وين بيشوفني




هاجر :- وين يعني في السوق ولا في الجامعه ولا في بيتكم



علياء بعصبيه :- شوف هذي اللي يسمعش ما يقول قاعده على جبدي 24 ساعه وين يشوفني يابنتي من متى والحريم يقعدون مع الرجال انا لو ادخل المجلس وفيه رجال يوم ثاني تحضرين عزاي على طول هذا وانتين تعرفين ان جدي وافق على الجامعه بالموت كله بسبب الخلط


اخذت علياء نفس من عقب الصراخ وقالت :- اذا ابوي لو شافني في الشارع يمكن ما يعرفني فشلون ولد اخوه وثانانيا وش دخل شافني وما شافني بالسالفه



هاجر وبكل عفويه :- يعني قلت لو شافش اكيد سحره جمالش مثل ما جمال امش سحر عمه


الا بقول لش جدش وش قال عن السالفه



علياء وهي مبوزه:- تدرين انش سخيفه وما ادري عن جدي هو قال بكل بساطه ترى عمش خطبش لولده خالد وانا قلت لهم يسوون الملكه في البحرين تراني حالف ما اطلعش من بيتي الا وانتي متزوجه واخذ روحه وراح المسجد يصلي العصر



هاجر وهي ترفع حواجبها وكتوفها دليل على الاستغراب :-غريبه يعني ما قال لش شي عن خلودي وليش هو وافق بهالسهوله



علياء :- سألته قلت له انت موافق يا جدي على هالخطبه ؟ قالي ايه ولمن قلت له بس انا مو موافقه قال لي عقب صلاة العشا لي كلام معاش



هاجر :- يمكن قصده انه بيتفاهم معاش ويعرف ليش انتين رافضه مو يجبرش



علياء وتعض على شفايفها وتتنهد :- اللي يسمعش يقول ما تعرفين جدي أي يتفاهم تعرفين يعني شنو لي كلام يعني هو اللي بيتكلم وتعرفين جدي ما بيقتنع باسبابي



هاجر بجديه :- زين ليش ما تستعينين بامش تعرفينها ما تحب اهل ابوش



علياء تطالع هاجر باندهاش :- والله جبتيها ما ادري شلون راحت عن بالي بس ان شاء الله تقدر تقنع جدي



هاجر وشافت ان هالاقتراح غير مزاج علياء فحبت تلعب على اعصابها قالت لها وهي تغمز:- لا تنسين وانتين تكلمين جدش تسالينه عن خلودي حلو مثل ابوش او لا



رفعت علياء راسها لهاجر واخذت علبه الكلينكس ورمتها لكن ما اصابه الهدف لان هاجر شالت عليه وراحت بيتهم



في مكان اخر في السعوديه في الرياض تحديدا



طالع من الفيلا بسرعه وسويج السياره في يده مبين عليه انه معصب حده شكله ونظراته تخلي أي عاقل يبعد عنه وما يحاول يتكلم معاه يحسس الل يقدامه انه مستعد انه يقتل أي واحد يوقف في طريقه دخل سيارته وسكر بابها بكل قوته ظغط على سكان السيارة بكل قوته كانه يفرغ كل غضبه في السكان وغمض عيونه بقوه واخذ نفس عميق وطرد كل الهوا اللي احتبس في صدره


عل وعسى اعصابه تهدأ


فتح عيونه على صوت موبايله طالعه كان المتصل طلال ولد عمه ما حب يرد عليه طنش لكن طلال كان مصر اخيرا قرر انه يرد


طلال:- واخيرا رديت وينك من الصبح اسأل عنك



..... :- انا هنا ما رحت مكان امر عسى ما شر



طلال :- ابدا بس ........... كنت يعني بقول .................



.............:- طلال وش فيك عمي به شي



طلال قاطعه :- لا يا ابن الحلال لا يروح فكرك لبعيد انا كنت بقول لك عن روحت ابوي وعمي الى البحرين



.................:- ايه قالت لي الوالده والي قاهرني انهم يتصرفون ولا كأني المعني بالامر يروحون يخطبون لي وحده من غير ما يسألوني حتى اذا ابغى اعرس وابغى البنت او لا



طلال :- هدي هدي لا يطق لك عرق اسمعني يا خالد انا الحين بفهمك بالسالفه كلها



خالد بعصبيه :- أي سالفه بعد يخطبون لي من غير ما يشاوروني او حتى يعطوني خبر


مثل الغريب يقولون لي خطبنا لك كانهم يعزموني على عرس واحد من الجيران والقهر ان امي اللي خبرتني موابوي



طلال :- والله اني فاهمك وحاسس باللي فيك المهم انت وين اللحين وانا اعلمك هم لش سوو كذا



خالد :- انا اللحين بطلع من البيت التقي وياك بالكوفي الي دايم نروحها



طلال :- زين اجل انا بسبقك بما اني قريب




سكر خالد موبايله ورماه على الكرسي اللي جنبه وقال في نفسه((اذا انا كذا وش حال ساره؟ والاهم وش اللي يخلي ابوي وعمي يخطبونها لي وش معنى هي ؟ وش معنى انا؟ المشكله اهم حاصروني وصار من الصعب اقول لا اااااااااااااااااااااااااااااااااااه راسي بينفجر))




ياترى من تكون ساره؟


وش سبب هالخطبه؟


وش مبرر عم خالد وابوه ؟

 
 
رد مع اقتباس
 
 
   
  #3  
قديم 18-05-2013, 01:10 PM
الصورة الرمزية صمت المشاعر
:: عضو مميز ::
______________
View صمت المشاعر's Photo Album  صمت المشاعر غير متواجد حالياً
 
أطياف الغرام / الكاتبة : معاميريا ; كاملة




الجزء الثاني



(( ليش))




طــــــــــــــــــلال



من البارحه وانا افكر في خالد الله يهديه عمي ما لقى الا خالد يزوجه من ........... استغفر الله حتى اسمها ما عرفته الا امس .............. المشكله وش اقول له اللحين اذا انا السالفه كلها مو داخله مخي كيف خالد يعني بكل بساطه يفرضون عليه انه يتزوجها............. اساسا هم يعرفون ان خالد مو من النوعيه اللي تمشيه على كيفك خالد رجال حر وكلمته وحده رجال ينشد فيه الظهر يفرض عليك احترامه رغم تواضعه بس عيبه انه عنيد وفي مشاعره اما ان يعطي بلا حدود او انه يجفو الى ابعد حد ........... انا اللي محيرني ليش عمي وابوي اختارو خالد بالذات هو صحيح مايرفض لابوه طلب لكن بعد عمي عمره ما اجبر احد من اولاده على شي وبالذات خالد يعامله على انه ند له ياخذ ويعطي معه ويهتم لرايه



وهو في غمرة افكاره انتبه على صوت مفاتيح السيارة اللي رماها خالد على الطاوله



رفع طلال راسه لولد عمه :-هلا كيف حالك



خالد جلس سند ظهره للكرسي ومد يده يلعب في المفاتيح :- احوالي انت تعرفها .....(( سكت شوي وفجأة قال)) ........ طلال ليش يبون يزوجونها ؟



طلال ابتسم ابتسامه باهته على جنب :- ابو ي يقول علشان ترجع بنته لحضنه و...............



رفع خالد راسه وطالع طلال بنضره حاده وقال :- أي حضن هذا اللي يبيها ترجع له ؟ وينه عنها كل هالسنين اللي طافت ؟وبعدين انا شدخلني تراها بنته يعني يقدر يروح ياخذها يعني سالفه الزواج مالها داعي



طلال وهو ياشر لخالد بيده بمعنى بشويش :- هدي وانا اخوك ترانا في مكان عام وشوي شوي علي انا بعد ما كملت كلامي .......... هو صدق الوالد عمره من قبل ما قال انه بيرجعها بس هذا مو معناته انه ما فكر في هالشي ..........((اخذ نفس عميق وحط مرفقه على الطاوله ))


جدها اتصل على الوالد من يومين وقال له ان في واحد خطب علياء وانه يبي راي ابوي في الخطبه قبل ما يرد على الرجال


خالد بابتسامه تهكميه :- هه وش رد عليه ؟ اكيد قاله لا البنت لولد عمها



طلال:- هو رفض بس مو بهالطريقه انت تعرف ابوك وعمك لو يفكرون كذا كان انت من زمان متزوج ندى بدل عزيز



خالد وهو يضرب صدره يقبضه يده:- انا هذا الي حارني لييييييييييييييييييييييييش لييييييييييييييييييييييييييش


وش معنى انا؟



طلال يفرك جبينه :- ابوي اتصل على ابوك وخبره بالمكالمه وقرروا ان البنت ما عاد تقعد في البحرين خلاص


لانهم مو كل يوم والثاني بيردون الخطاب ابوي يقول ما يبغى يزوجها أي واحد ويبغاها جنبه وابوك يقول انها ما ينفع تتزوج واحد من برى العايله لانه بكذا الحلال يروح برى العايله .............. واتفقوا يخطبونها لك بكذا تعيش قريب من ابوي ويضمنون الحلال




خالد بعصبيه :- هذا كلام ما يدخل دماغي كلام غير منطقي.......... ليش عزيز من العيله يوم يزوجونه اختك ندى لو لان ابوه شريكهم في مشاريع الشرقيه ((سكت شوي وغمض عيونه كانه بهالطريقه بيهدأ من انفعاله ))


على فرض اني وافقتهم على منطقهم الغريب هذا طيب ليش انا وش معنى انا بالذات ليش مو تركي او سلطان او حتى ماجد ولد عمتى ........... أي احد بس مو انا ........



طلال وهو يطالع ولد عمه بنضرة اعتذار :- ما ادري بس انت تعرف سلطان اصغر منها بسنه لانها في سن اختى وداد واختك العنود غير انه لا زال يدرس وماجد خاطب وداد وتركي ...................



خالد :- وتركي اكبر منها ومو خاطب احد لكن انا متكلم على ساره ............... ليش يا طلال انا بالذات تدري اني ما عرفت الا عقب ما راحو البحرين وكلمو جدها كاني كرسي يشيلونه ويحطونه بكيفهم ومتى ما بيغون


ما كاني انسان له قلب ومشاعر وعقل ............طلال انا رجال واتحمل لكن ساره ما فكرو فيها في ردة فعلها


اذا مو علشان مشاعرها علشان امها هذي اختهم مو غريبه ............. انا ابي افهم من هي علياء((واشر اشاره تدل على انها شي صغير وحقير من غير قيمه)) اللي علشانها يجرحون ساره ويذبحون كرامتى ..............انا يا طلال انا انجبر على شي ما ابغاه




لو واحد ثاني غير طلال كان زعل من خالد انه يتكلم عن اخته بهالطريقه لكن خالد مو أي واحد هذا ولد عمه واعز واقرب صديق على قلبه باختصار اخوه اللي ما جابته امه ولانه يعرفه مثل ما يعرف نفسه فهو عاذره لانه يعرف وش قد خالد يعز ساره ويحبها ...........بس مع ذلك حميته وغريزه الاخوه وتربيته وغيرته على محارمه خلته يقول



طلال:- ليش انت بالذات هذا شي اسأل عنه ابوك وعمك وثانيا انا عارفك زين وادري انك مو من النوع اللي ينجبر وانا اللي اسألك وش الي جابرك واذا على علياء تراها بنت عمك ويمكن تكون اخير لك من ساره



خالد قاطعه والكلام مو عاجبه :-اللي جابرني؟!! قول اللي كاسر ظهري ان هالعلياء تصير بنت عمي اللي كاسر ظهري كلمه ابوي لعمي اللي كاسر ظهري اني ما اقدر اقول لعمي ما ابي بنتك ما اقدر لاني لو سويتها بذبح عمي واوطي راسه ومو انا اللي اسوي كذا لو على كسر رقبتي ولو مو كذا ما كنت تنازلت عن ساره وانت تدري من هي ساره ومستحيل في احد احسن منها




طلال :- كلامك هذا مردود عليه انا ما اعرف شلون هي علياء لكني اعرف ابوي ولو جدها مو رجال ويعرف يربي ما كان امنه على بنته وساره من دخلت الجامعه وهي تغيرت حتى على وداد والعنود يقولون انها ما عادت مثل اول واسأل العنود وهي تقول لك................. واذا انت منت راضي بعلياء تكلم مع عمي وقوله عن تركي تراه يناسبها واللي ادري عنه ان قلبه خالي وبكذا ابوي ما بيزعل ولا صاير عليه شي



خالد :- كانك ما تعرف ابوي هو قاصد اني ما اعرف بالموضوع الا بعد ما يسوي كل اللي يبغاه علشان يقطع على الطريق وما اقدر اعتذر او اتراجع ابوي لعبها صح .............((شرب من كاسه الماي اللي قدامه وكمل))



ابوي خطب علياء من عمي في مجلسكم قدام الرجاجيل واهمهم زوج عمتي ابو ماجد فلو اعترضت اكيد الناس بتتكلم وش فيها بنت عمه علشان يردها والناس بتحكي فيها وهذا شي ما ارضاه على بنت عمي وعمي


غير ان ابوي قال قدام ابو ماجد بعد ما وافق عمي على هالخطبه اني مستعجل وابيهم يروحون البحرين يتممون الخطبه قبل ما ارجع من جده .............. واكيد هالكلام وصل لساره وصدقت ...............اخ بس لو عندي طريقه اوصل لساره الحقيقه




طلال :- يا ابن الحلال ما يصيبك الا نصيبك وهذا اللي الله كاتبه لك وعسى ان تكرهوا شيئا وهو خيرا لكم



خالد :- ونعم بالله بس اللي يده في الما مو مثل اللي يده في النار انت وش عليك العنود وضامنها في جيبك



طلال :- يا اخي خليها على الله اللي يسمعك يقول هي عندي في البيت او حتى مالك عليها


يكفي انها شارطه انها ما تتزوج الا بعد ما تكمل جامعه



خالد بابتسامه:- اللحين اللي يسمعك يقول بيستناها عشر سنين ترى كلها دبلوم يعني سنه وحده لسى باقي لك تستنى



وتغيرت وجهة الحديث ويمكن اللي يشوف البسمه والضحكات اللي تخللت كلامهم يقول انهم نسو او رضو بالامر لكن لا كل واحد منهم داخله شايل على قلبه هم



خالد يفكر في ابوه وليش اختاره هو بالذات ويفكر في............... ساره وشعورها ناحيه خطبته وشلون يوصل لها انه مجبور على هالخطبه خاصة ان ما بينهم أي اتصال حتى العنود اللي كانت تنقل له اخبارها وتكلمه عن احاسيس ساره واحلامها تجاهه ما عادت مثل اول صارت تتهرب هي صحيح تجاوبه على اسألته بس ما عادت تسولف له عنها مثل اول يحس ان العنود تغيرت على ساره علاقتها معها مو مثل اول كانو على طول مع بعض وين ما تكون العنود تلاقي معاها ساره و وداد اللحين ما عاد ينشافون ثلاثتهم مع بعض الا في جمعات العيله وبعض طلعات السوق يا ترى بترضى توصل لساره حقيقه موقفي .................. ويفكر وش ردة فعل امه هو يذكر انها ما تحب نجاة ايه كان اسم امها نجاة ..............ردة فعل العنود يمكن تكون ما عادت بهالقرب من سارة بس لا زالت صديقتها وبنت عمتها غير انها تعرف اني احب ساره...................ردة فعل نجود اللي كانها توم لسعاد بنت عمي اللي تكرهه وحده منهم تكرهه الثانيه واللي تحبه وحده منهم تحبه الثانيه


.....................اما تركي عاد من رد من بريطانيا العام اللي فات عقب ما تخرج وهو غير ما عاد تركي المرح اللي يحب الجمعات حتى علاقته بماجد احسها يسودها نوع من البرود وما اظن يهتم بالذات في امور تخص بيت عمي ابو طلال.....................اما سلطان كل شي عنده ايزي




طلال يفكر في خالد شايل همه يتخيل لو هو مكانه وجبروه يتخلى عن العنود وش بيكون احساسه


اكيد مو ارحم من الموت ................. وشايل هم امه كيف بتستقبل بنت ضرتها كيف بتتحمل وجودها معاها في نفس البيت


وخواته...................... ندى اللي يعرف انها ما تتقبل زيارات ابوي القليله لبنته شلون بتقبل ان هالبنت تقعد في البيت ويجيبونها هنا .....................وداد اللي عارفه ان مشروع خطبة خالد لساره مو مجرد كلام لانها تعرف مشاعر ساره تجاه خالد بحكم صداقتها لساره وعارفه بمشاعر خالد لساره بحكم صداقتها للعنود


................سعاد بنت ال16 سنه الدلوعه اللي اكيد بيزعجها وجود بنت الحرمه اللي العايله كلها تكرهها لانها تزوجت ابوها على امها وفي الاخير تخيره بينها وبين امها ...................... وما مرتاح الا فيصل


ابو العشر سنوات اخر العنقود الوحيد اللي موهامه شي وبالعكس يمكن يترقب يشوف هالعلياء بس من باب الفضول




يفكرون في الكل ومهتمين في الكل لكن محد فكر في علياء شعورها احساسها ردة فعلها يمكن في احد مهتم لكن للاسف ما في يدها غير انها تخفف عنها وتحسسها ان في احد جنبها صديقتها وجارتها هاجر



في البحرين على العشا في بيت جد علياء



الجد وهو قايم من السفره :- الحمد لله اللهم ادمها نعمه واحفظها من الزوال................... علياء



علياء وهي تشيل الصحون من على السفره :- سم يبه



الجد ابو محمد:- سم الله عدوش يبا اليوم بشرب الشاي في الصاله ابي اكلمش في موضوع ولد عمش



علياء وقلبها يدق بسرعة جنونيه ((قرب وقت المواجهه يا علياء)):- ان شاء الله يبه



عقب ما خلصت علياء من غسل الصحون جهزت صينيه الشاي وراحت بها الصاله قعدت على الارض قبال جدها القاعد على الجلسه العربيه وصبت له استكانه ((بياله)) الشاي ومدتها عليه



علياء :- تفضل يبه



ابو محمد :- زاد فضلش يا بنتي ((شرب رشفه من الشاي ونزلها في الارض قدامه)) علياء ابوش البارحه تعنى هو عمش من السعوديه للبحرين علشان يخطبونش لولد عمش الكبير اللي اسمه خالد ويبون ياخذونش وياهم السعوديه بكره



بدون وعي وبتسرع علياء قاطعة جدها ولاول مره :- بس انت قلت اني ما اطلع من اهني الا مالكين علي شلون اروح السعوديه بكره غير اني ما ابيه ما ابي اتزوج ما ابي اتزوجه


علياء ابتدت كلامها بصوت عالي ومع سيرت الزواج غلبها الحياء وانخفض صوتها وبالنسبه لها قمة الشجاعه انها قالت هالكلام في وجه جدها




يمكن تستغربون بنت عمرها 20 سنه في هالزمن وتستحي انها تقول لا ما ابي اتزوج لا وتعتبر شجاعه بعد بس لا علياء شخصيتها مو ضعيفه بس شخصية جدها وطبيعة تربيتها هي اللي تخلي تصرفها هذا عادي


علياء رباها جدها على ان البنت السنعه لازم تلتزم بشغل البيت كله ويمكن هالشي فرضه تفكيره كرجل كبير في السن ووضعهم المادي اللي ما يسمح ان يستقدمون خدامه يكفي ان في ايام الدراسه ان زوجه خالها محمد تطبخ الغدا لهم ومثل ما ربى في نفسها ان شغل البيت واجب المره بعد ربى في نفسها الخلق الكريم من احترام الغير الالتزام بالصلاة والصوم والاهم اكتسبت من جدها انها ما تتكلم قبل ما تفكر وان كسب احترام الشخص لك واقناع غيرك برايك ما يجي بالصراخ او الدلال او الصياح بالعكس الرصانه والهدوء والصبر هو اللي يوصلك لهدفك ويخلي الناس تحترمك وتعلمت بعد شلون تخفي وتسيطر على مشاعرها



جدها له هيبه مو معقوله وبنضره وحده وكلمه وحده يخلي اللي قدامه يطيعه ويخافه بعد لو كان قاصد... عمره ما صرخ عليها او ضربها علشان تنفذ شي طول عمره يوصل لمبتغاه بكلمات قليله ودائما قول وفعل عمره ما قال شي وما سواه علشان جذي كلمته اقوى من افعال ناس واجد........... ومتى ما عاملته بطيب واحترام وكلمته بمنطق كلما زادت فرصتك انه يطيعك وينفذ لك طلبك




ابتسم ابو محمد :- ما ابي اتزوج هذا مو كلام كل بنت مسيرها تتزوج .................اما ما ابي اتزوجه هذي عاد تحتاج تقولين لي ليش؟ والسعوديه بنروح عقب يومين وياي وما راح اخليش الا اذا ملكو عليش




علياء وهي تبلع ريقها تفكر وش الشي اللي ممكن يقنع جدها :- يبه انا ما ابي اروح السعوديه يعني 20 سنه ما سألو عني ولا اهتمو اللحين اروح واتزوج من هناك انا ابي اقعد وياك قريب منك ما ابي اخليك بروحك وثانيا خالد هذا ما اعرفه .......... اقصد ما نعرف عنه شي اتزوج واحد كل اللي اعرفه عنه ان اسمه خالد


.... غير ان امي يمكن ما توافق يعني اقول يبه انت تدري ان امي ما تحب اهل ابوي شلون اتزوج واحد تكرهه امي



ابو محمد بكل هدوء:- شوفي اول شي ابو ش ما كان راميش وما سأل عنش بالعكس وانتي تدرين ان لبسش واغراض المدرسه ومصروفش كل من عنده ما في غير هالسياره الي تسوقينها واكلش اللي من عندي غير انه يجي لش في الاعياد وغيرها كم مره



علياء :- بس هذا واجبه ومو دليل اهتمام



ابو محمد وشوي خلقه ضاق:- علياء انا ما كملت كلامي واللحين اللي يسمعش مهتمه في راي امش يقول انها مو مقصره ويوميا عندش وتسأل عنش وترى اذا لانها ما تحب اهل ابوش ما بتتزوجينه عجل تبري من ابوش لانها ما تحبه...غير انها ما لها كلمه في زواجش ولا شور...............


((ابو محمد اللي مربي علياء ويعرفها زين حس بالدموع اللي بدت تتجمع في عيون علياء وخلتها تلمع كمل وهو يخفف من حدته لهجته))


واذا علي انا ما بتم بروحي انا بس تروحين بيقعد عندي ولد خالش وزوجه خالش تقوم بخدمتنا الى ان يتزوج ولد خالش ومرته تقوم بالبيت ومو من بعدها السعوديه متى ما بغيتين تجين تعالي



وثاني شي اذا انتين ما تعرفين ولد عمش يعني غيره بتعرفينه يا بتي ؟!!



هزت علياء راسها اشارة لاوواصل ابو محمد كلامه:- انتي ما تعرفينه لكن انا اعرف ابوش واعرف عمش بعد رجال ما يربون الا رجال ولو ما هو يستاهل ما زوجه بنته ترى مهما يكون الابو ما يرمي بنته لاي واحد ولو كان ولد اخوه............. وابوش انا اعرفه وما دام قال ان خالد رجال ما يتعيب عليه خلا ص .................


والمره يكفيها انها تعرف ان رجلها على دين وخلق ولد اصل وفصل وعنده شغله حلال يعيل فيها بيته ومرته واولاده............ وانا ما اقدر اقلول لا على الرجال وهو ما يعيبه شي خاصه ان ابوش ولي امرش موافق عليه ............. غير انه لو جاني يخطبش ما رديته



وقام ابو محمد منهي بهالحركة الكلام في الموضوع وطبعا بالنسبه له علياء ما قدمت أي عذر مقبول ولو انها كلمته عن مخاوفها كان ما بيكلف نفسه حتى عناء الرد عليها يعني خلاص جدها حكم عليها بالزواج من خالد وقام حتى من غير ما يهتم اذا كانت اقتنعت او لا



حست علياء ان الدنيا ضاقت عليها وان خلاص ما في امل حتى امها اللي كانت بتكلمها اليوم عن موضوع الخطبه وتعتمد على كراهيتها لاهل ابو طلال علشان تساندها وتدعمها في قرارها ما عاد ينفع لا جدها قال وكلمته وحده(( امش ما لها راي ولا شور))وهي في غمرة افكارها سمعت صوت موبايلها وكانت المتصله هاجر


ردت علياء وقبل ما تسلم قالت هاجر :- هاه وش صار ؟ وش قلتين لجدش ؟ وش قال ليش؟ اتصلتين بامش؟



علياء بهدوء عكس حماس هاجر :- بسم الله علي شوي شو ي حبه حبه واول يسلمون



هاجر وحماسها ما خف :- سلاااااااااااااااااااااااااااام والحين وش الاخبار بسرعه ما عندي لا وقت ولا رصيد



علياء ضحكت على هاجر :- وعليكم السلام ما في اخبار تسرش جدي ما قتنع بكلامي وقالي باختصار ولد عمش رجال دين وخلق واصل وفصل ويشتغل وهذا يساوي رجال ما ينرفض وامي حتى لو باتصل فباتصل علشان اخبرها لان جدي قال امش ما لها شور يعني قفلها وطلع وهو اكيد في نفسه يقول انه ضيع وقته على لا شيء



هاجر بهدوء يدل على حماسها اللي انطفى :- زين كان قلتين له عن مخاوفش من هالزواج يعني قدرتين تقنعينه بدخول الجامعه والسياقه ما تقدرين عليه في هذي



علياء باحباط :- هذي غير والجامعه والسياقه غير تدرين الجامعه شي يخص العلم وجدي محب للعلم يحترم سعي الواحد لانه يتعلم ومع هذا ما وافق الا بعد ما قبلوني في تخصص تدريس يعني مستقبل الوظيفه ما في خلط........... والسياقه تدرين زحمت مواعيد باصات الجامعه تطلعين من صباح ربي وما ترجعين الا العصر وفي عز الشتا قريب اذان المغرب غير ان الباص فيه خلط وهذا ما يعجب جدي حتى لو الاولاد في ناحيه والبنات في ناحيه وعدم وجود من يلتزم بروحتي وجيتي لكن هذي وش اقوله خابفه من ابوي وعيلته خايفه من نظرتهم لي خايفه من هالعالم الجديد (( تتنهد بقوه)) خليها على الله



هاجر وحست بعلياء وما حبت تتركها جذي قالت لها بنبره هيام وعشق علشان تغير مزاجها:- زين ما قلتين اهم شي جدش ما قال لش شلونه خلودي طوله عرضه عيونه خشمه خدوده صوته



علياء وفعلا تغير مزاجها :- خلودي في عينش وما دورتين الا جدي اسأله عن هالسخافات



هاجر وعجبها تعصيب علياء :- في عيني هاااااااااااه لكن ما اقول الا حسبي الله على الغيره وعلى العموم بكره بجي وبعرف التفاصيل وريوقي عليش


علياء وبحمق:- غيره ... غارت عليش .............. وش اقول حسبي الله على عدوينش واي ريوق ليكون ناويه تجين من صباح الله خير



هاجر وبكل برود :- اكيد بكره الجمعه وغير الصبح ما بشوفش بروحش لان خوالش وعائلاتهم عندكم ..................واحم احم حمودي بعد بيتغدى عندنا بكره



علياء باستسلام :- زين امري لله تعالي يلا مع السلامه




هاجر :- مع السلامه ايه ولا تنسين تقولين لجدش يعطيش صورة لخلودي


وسكرت التلفون قبل ما ترد عليها علياء




اتمنى ان يحوز هذا البارت على اعجابكم


مع اعذب وارق التحايا


 
 
رد مع اقتباس
 
 
   
  #4  
قديم 18-05-2013, 01:11 PM
الصورة الرمزية صمت المشاعر
:: عضو مميز ::
______________
View صمت المشاعر's Photo Album  صمت المشاعر غير متواجد حالياً
 
أطياف الغرام / الكاتبة : معاميريا ; كاملة




الجزء الثالث


((احكام مسبقه))



علــــــــــــيـــــــــــــاء



قعدت اليوم من وقت رغم انه يوم الجمعه لان خوالي وعايلتهم يتجمعون عندنا وبما انها اخر جمعه اكون وياهم فيها فقلت لزوجة خالي محمد اني راح اطبخ هالجمعه بدلها.............. لبست دشداشه بيت قطنيه ربع كم ورفعت شعري بكلبسه ونزلت سويت الريوق ........... جهزت صينيه الريوق ورحت ناديت جدي



ابو محمد اول ما قعد يتريق اخذ من علياء كاس الشاي ورقع عينه لها:- علامش يبه وش فيش ما بتتريقين وياي



علياء:- لا يبه انا عازمه هاجر بنت عمي ابو عيسى على الريوق


هز الجد راسه بمعنى انه عارف خاصه انه متعود على جيات هاجر البيت


طبعا ابو عيسى اللي هو ابو هاجر مو عم علياء بس لانه صديق ابو محمد وعلى طول وياه فعلياء تعودت تناديه عمي



عقب ما خلص ابو محمد ريوقه طلع كلمعتاد يشوف زراعته الصغيرة اللي ورى البيت وعلياء قامت تكنس البيت عقب ما غسلت الصحون وبس طفت المكنسه الا هاجر قدامها



حطت علياء ايدها على صدرها وفتحت عيونها على وسعها:-بسم الله خرعتيني من وين طلعتي



هاجر وهي تطالع علياء بنص عين:- ليش قالو لش جني؟ وهذا بدل ما تعتذرين ترى صار لي ساعتين وانا على الباب لو ما جدش فتح لي الباب



علياء بابتسامه وترفع حاجب :- وعليكم السلام .... كنت اكنس ما سمعت الجرس واعرفش ما بتخليني اكنس وانتي اهني بتقولين ما اعرف اسولف لان المكنسه مزعجه



هاجر :- زين سويتين بس عاد من صباح الله خير تكنسين



علياء وهي ترفع المكنسه وتوديها المخزن:- لان هالجمعه انا اللي بطبخ الغدا ويلا تعالي تريقي ترى من قمت من النوم ما اكلت شي



عقب الريوق اللي طال مع السوالف وتفاصيل احداث الامس وفي المجلس الواسع اللي مفروش بجلسه عربيه على كبره وعلياء تنظفه وتبخره لان الرجال يجتمعون فيه شهقت هاجر



:- ويش ؟!!!! يومين يعني عقب بكره وان شاء الله بيملكون مباشره من توصلون السعوديه؟



علياء وهي تضحك من حركة هاجر وشلون تعفس وجهها :- لا اجلناها ليوم الثلاثاء علشان يمديني اوقف قيدي في الجامعه تدرين اني ماخذه مادتين صيفي والمعاملات الباقيه علشان اكمل دراستي هناك بيقوم بها خالي وعلى كلام جدي الملكة بتكون يوم ثاني من وصولنا



هاجر وهي تحوس فمها على صوب:- هه خيبه اجلنا (تقولها بتهكم) اللي يسمعش يقول مأجله شهر... اذا جذي ما لش الا فستان جاهز للملكه ويا الله يمديش



علياء اللي ما فكرت في هالشي ابدا:-تدرين ما فكرت بس ولو يعني وش اشتري وانا ما اعرف اذا بتكون ملكه بسيطه او فخمه ...


((سكتت شوي تفكر وكلامها ما عجبها)) اكيد بتكون بسيطه جدا يعني من انا علشان تكون كبيره



وتوها هاجر بتعترض الا علياء تسألها عن حمد واهني انقلب حال هاجر وردت بهيام:-شفته يا علياء محلو ظعفان(نحفان) بس تدرين الضعف لايق عليه بس هالمره ما قعد ويانا بس سلم على امي وطلع



علياء وقاصده تغايظ هاجر:- اكيد ما يبي يشوف رقعة وجهش قال اطلع ابرك لي



هاجر تخصرت بيد واليد الثانيه تأشر على نفسها :- ليش هو يطول اصلا يشوف هاجر بنت جاسم (( وبحزن تقول)) هو ماقعد لاني اتغطى عنه



علياء باستغراب:- تتغطين بس انا خبري انكم ما تتغطون عن اولاد عمكم وخالاتكم



علياء وهي ترفع يدها بالدعاء :- شفتي شلون حسبي الله على سويلم


كل منه اجبرني اني اتغطى عنهم وانا اصغر وحده صايره عجوز بين خواتي تدرين هم رجالهم عندهم عادي ما يغطون وجوهم ....


((ووطالعت حضنها وبنبره حزينه قالت )) تدرين حمد سلم على خواتي كلهم بالاسم ويوم وصل عندي قال شخبارش حاجيه... انا حاجيه!!!!!!!!!!!



علياء ما مسكت نفسها من الضحك وابتدت التعليقات والمزح



في الرياض



عقب صلاة الجمعه دخل خالد مع ابوه واخوانه بيتهم لقو ام خالد مع بناتها قاعدين في الصاله سلمو وقعد ابو خالد جنب ام خالد واشر لاولاده انهم يقعدون شوي معاهم قبل ما يروح كل واحد غرقته



ابو خالد وهو يوجه نظراته لخالد:- احنا قدمنا رجعتنا من البحرين لان ابو محمد ((وردا على نظرات الاستفهام قال)) جد علياء بنت اخوي


اتصل وقال انهم ما يقدرون يجونا قبل الثلاثاء...........



سكت كانه ينتظر احد يسأله عن شي فقالت ام خالد:- يعني على كذا بتأجلون الملكه؟



وقبل ما يرد ابو خالد قالت نجود بلقافتها المعهوده:-زين احسن بعد اجلوها على الاقل اسبوع كان نقدر نشتري شي يسوى للملكه



العنود ناظرتها بمعنى سكتي احسن وخالد تمنى ان التاجيل يكون اكثر من اسبوع وتركي عاقد حواجبه وسرحان في شي ثاني وسلطان متكتف وماخذ موقف المتفرج اما ابو خالد ابتسم وقال



:- بنأجلها ليوم الخميس ((يناظر ام خالد)) ودبروا روحكم انتي والبنات في هاليومين وشوفي البنات كم يبون وانا اعطيكي... اما انتم ((يقصد الشباب)) تركي وسلطان بعطيكم فلوس وتتكفلون بامور الملكه وهالله هالله ابيكم ترفعون راسي تراها ملكه خالد ولد مشعل بن سلمان ال........ ((والتفت لخالد )) اما انت ابغاك تروح مع طلال ولد عمك البحرين تجيبون ابو محمد وعلياء ((وكمل كانه بيقطع على خالد الاعتراض )) ترى الرجال ما يسوق واولاده كلن لاهي بشغله


وعمك وانا ما نقدر ننزل البحرين هاليومين



خالد وما زال غير مقتنع:-طيب يبه ماله داعي اخاوي طلال هوبالحاله يروح



ابو خالد وهو قايم علامة انتهى النقاش:- ولد عمك ما يدل بيت ابو محمد وانت سبق ورحت مع عمك



خالد وبشبه رجا لابوه انه يتفهمه:- هي مره وحده وصلته ورحت اكمل شغلي حتى ما نزلت معه اخاف اخربط ما ادل البيت عدل



ابو خالد وهو يناظر ولده بنظرة اني فاهمك زين:-دامك تدل الحي خلاص ما بتضيعون ما ضاع من سأل... يلا انا برقى غرفتي ابدل على ما تزهبون الغدا



رقى ابو محمد وخالد بعد ما طاق يجلس من بعد هالخبر هو مو طايق البحرين بكبرها كيف اللحين يبونه يروح يجيبها



اما تركي قال وهو قايم غرفته علشان يبدل هو بعد:- طيب ما قال لنا وين فيه يبون الملكه



ام خالد :- في الاستراحه اوسع واكبر والصاله توسع حريم العيله(( وتاشر على بناتها)) يلا قومو ساعدوني نجهز الغدا



العنود قامت ورى امها ونجود تاففت وقالت :- ليش حنا نجهز والشغالات وش مهنتهم؟ وبعدين يمه الاستراحه توسع للرجال بس الحريم ما توسعهم الصاله



العنود ومو عاجبها كلام نجود :- وانتي ليش مهتمه هالكثر من زينها بنت نجاة علشان تبين تتزينين وتبين مكان واسع



نجود وهي تتخصر :- انا ما تهمني بنت نجاه انا يهمني برستيجي


تبين يقولون نجود بنت مشعل ما تعرف تلبس او يقولون ابو خالد ما اهتم وسوى لولده ملكه على قد الحال



ام خالد علشان توقفالمشاده بين الثنتين اللي يمكن تقلب هواش:- بس انتي وهي واشتغلو بسكات ولعلمكم ثنتينكم بتتعدلون لملكه اخوكم


والصاله توسع لان الملكه ما راح يحضرها من الحريم غير بيتنا وبيت عمكم وعمتكم والحريم اللي بيجون من اهل علياء سمعتون اسمها علياء لا تنسون انها بنت عمكم وابوكم بيذبحكم لو سمعكم ((وكملت وهي تحط يدها على راسها وتغمض عيونها)) وانا ما حب اسمع سيرة نجاة في بيتي والله يستر ما تكون مثل امها




يوم الثلاثاء في البحرين



خــــــــــــــــالد



من اعلن الطيار وصولنا البحرين وانا وطلال حل علينا صمت رهيب كل واحد سارح في عالم مختلف عن اللي حولنا خلصنا امورنا واخذنا تكسي وطول الطريق وانا بالي مشغول حتى ما فهمت شي من هذرة السائق وفقت على طلال يناديني


طلال:- خالد الرجال يقول لك وصلنا والحين وين يروح



وصفت للسائق الطريق وقفنا على باب بيت ابو محمد باب خشي لبيت شعبي قديم بس واضح انهم يرممونه بين فتره والثانيه كنت اطالع الباب واتسأل عن الناس اللي عايشه ورى هالباب او الاصح عن وش الي بيجيني من ورى هالناس غير حرماني من ساره وما انتبهت الا على صوت التكسي متحرك من المكان سالت طلال



خالد :- ليش مشيت الرجال ؟



طلال وكان الامر مسلم به:- احنا ما ندري كم بنجلس عند ابو محمد


فما اقدر اخلي الرجال يستنى في هالقايله



تظايقت من فكرة اننا ممكن نطول هنا ناظرت الساعه وقلت :-واحنا جايين شفت مسجد قريب من هنا خلنا اول نصلي الظهر ونرجع



وافقني طلال وبعد الصلاة وقريب من بيت ابو محمد قلت لطلال ما دام رحلتنا للرياض الساعه ثلاث خلنا نتغدا اول بعدين نجي للرجال


هالمره طلال عارضني وقال:- لا اول نروح له علشان يستعدون تعرف الحريم عاد ما نبيها تعطلنا على اخر لحظه



كنت ابي ااجل بس وش اسوي طلال عنده حق وصلنا عند الباب ودقينا الجرس .........مره .........مرتين .........ثلاث....محد رد قلت بتفاؤل



:- اكيد ما في احد في البيت



طلال :-يعني وين بيروحون في هالوقت؟ وبعدين هالجيب اللي عند كراجهم اكيد لهم



توني برد على طلال الا بشاب طالع من بيت جيرانهم التفت لنا وجا سلم علينا وسالنا



الشاب:-امرو من بغيتو



طلال :- بيت الحاج عبد الرحمن ابو محمد



الشاب :- وصلتو خير هذا هو بيتهم



طلال :- الظاهر ما في احد ندق عليهم ولا حد يرد



الشاب طالع ساعته وقال :- كلها ربع ساعه ويوصل اكيد مر مع الوالد الدكان .... شكلكم مو من البحرين؟



رديت بحده وانا مو عاجبني هالولد ما اعرف ليش :- احنا اهله من السعوديه



رد الشاب وهو يدخل ايده في شعره:- هااااااااا زين تفضلو انطروه في المجلس اذا ابو محمد يدري عن جيتكم اكيد خلاه مفتوح


واشر على باب خشبي صغير قريب من باب البيت الرئيسي وقبل ما يشوف اذا الباب مفتوح او لا دق جواله رد



الشاب :- نعم وش بغيتين؟



الطرف الثاني:-...............


الشاب :- زين اللحين بحركها ((سكر جواله وكمل)) اهل البيت وصلو



والتفت لوراه شفنا بنت جايه مقبله علينا راح لها الشاب بس سلم عليها ومد يده بياخذ شي من عندها الا طلال راح وراه وقف بين الشاب والبنت هنا انا طالعت وجهها شكلها مألوف ليكون...........


اخ هذي اللي اخير من ساره كاشفه الوجه وتكلم ولد الجيران عادي


ضغطت على ضروسي وشديت قبضت ايدي وغمضت عيوني


علشان امسك نفسي ما اروح اصرخ عليها واكفخ الولد




علــــــــيـــــــــاء



اليوم كان متعب انهد حيلي من المراكض من قسم القبول والتسجيل الى رئيس القسم الى العميد صار لي يومين اراكض علشان تواقيعهم


وعاد المسافات وهالحر زين اني خلصت قريب اذان الظهر رحت مسجد الجامعه ومنه طلعت على طول الى البيت وما قدرت ادخل سيارتي الطبيله لان سالم موقف جيبه قدام الطبيله اووووووووووووووووف ما لي الا هاجر


دقيت على هاجر ومن غير ما اسلم



علياء:- هاجر قولي لاخوش يحرك سيارته من قدام الطبيله ابي ادخل سيارتي



هاجروتعرف ان ما في احد يسويها غير سالم:- بس سالم توه طالع من البيت...ان شاء الله ما طلع مع واحد من ربعه باتصل عليه واقول له



رديت من غير نفس:- ااااااااف زين عجل اذا جا خليه يدق جرس بعطيه مفاتيح السيارة يدخلها مره وحده مع السلامه



هاجر :- فيش خير انا قلت ما سلمت ما بتقول مع السلامه على العموم الله يسلمش


قفلت موبايلي وبندت السياره لميت اوراقي نزلت من السياره قفلتها مريت من جنب جيب سالم الا واشوف ثلاثة رجال عند باب المجلس الخارجي اثنين منهم مقابليني والثالث يتكلم في تلفونه وصلت قريب باب البيت الا يلتفت لي الثالث استغربت هذا سالم من متى يمشي مع ناس كشخه جذي شوي الا جاي ناحيتي وعلى وجهه ابتسامه عريضه



سالم وابتسامته شاقه الوجه :- سلام يالجاره شخبارش؟



رديت ببرودالصراحه انا ما اطيق سالم بالذات اني اعرف انه راعي بنات :-الحمدلله



وقبل ما اكمل كلامي قال :- عطيني سويج سيارتش انا بدخلها لش الطبيله



واحد من الشباب اللي كان واقف وياهم جا وما لقيته الا واقف بيني وبين سالم واخذ السويج اللي مديته لسالم قبل ما ياخذه سالم وقال



:- انا بدخل سيارتك ((طالع سالم وكمل )) وانت حرك سيارتك ((رد التفت لي وقال)) باب المجلس الخارجي مفتوح او لا



تجمدت مكاني كان واقف قريب مني بلعت ريقي ورديت من غير وعي:-هاه!!! لا الباب مقفول



رد بكل بساطه :- طيب بس ارجع لك مفاتيحك عطيني مفاتيح الباب



كنت متنحه وقبل ما ارد عليه رد سالم بحده :- نعم يا الحبيب وين تحسب نفسك ومطيح الميانه بعد تعطيك المفاتيح



الشاب الثاني جا وقف بين سالم والشاب الاول وقال للاول:- خير يا طلال وش فيه


رد طلال وهو يطالع سالم :- بصفتي اخوها (( وطالعني بغضب )) للحين واقفه دخلي



دخلت البيت بسرعة وحمدت ربي اني كنت مطلعه مفاتيح البيت من قبل قفلت الباب وراي وركضت في الحوش لين وصلت لباب الصاله دخلت الصاله ورميت اغراضي على الارض طاحت عباتي على كتفي وسندت روحي على باب الصاله هذا طلال؟!!! هذا اخوي؟!! شلون عرفني ؟


وانا ما عرفته واللي معاه يمكن يكون هو بعد اخوي ايه اكيد اخوي لانهم يتشابهون مشاء الله على اخواني طوال وحلوين صدق طلال اقصر شوي وحظه في الوسامه اقل من الثاني رغم ان طلال ابيض وهذاك خمري بس مبين ان طلال بشوش عكس اخوه شكله ما ادري شلون له هيبه وحظور قوي ومبين انه جاف في المعامله وش اسمه يا ربي ............. ضغطت على راسي ابي اتذكر ابتسمت ايييييه فيصل بس فجأة استدركت ان حسب كلام ابوي في زياراته القصيره ان فيصل هذا اخر العنقود صغير ضربت بايدي على جبهتي وقلت بصوت مسموع



:- هذا مو فيصل من هذا؟



وفجأة سمعت صوت الجرس اخذت نفس وعدلت حجابي ورفعت دفتي على راسي ورحت عند الباب وبصوت عالي علشان يسمعني اللي ورى الباب:- من بالباب؟



رد على صوت رجولي صرت اعرفه:- انا طلال فتحي الباب



فتحت له الباب ومد يده يعطيني سويج سيارتي وقال بابتسمه على جنب


ما تعرف هو يمزح او يتهكم:- وتسوقين بعد....هم ما علينا وين مفتاح المجلس ؟



حطيت ايدي على فمي وفتحت عيوني وقلت :- نسيت لحظه بجيبهم لك



طـــــــــــلال



بعد ما دخلت سيارة علياء داخل الكراج طلعت للولد وصرفته تحرك الولد من هنا ونطق خالد من هنا وقال ولا زالت عيونه مليانه غضب



:-من هذا ؟ وش كان يبي منها؟


قلت له وانا حاط يدي على كتفه :- هذا ولد جيرانهم وكان مسكر على الكراج بسيارته فراح ياخذ المفاتيح علشان يدخل سيارتها بنفسه



خالد وزاد غضبه ما قل :- وتسوق بعد ؟ وليكون هي اللي اتصلت عليه


يحرك سيارته ؟ هذا اللي ناقص بناتنا يكلمون شباب في الشارع وفي التلفونات بعد....... والله ثم والله ان كانت تكلمه لكسر راسها



هذا خالد حليم وصبور لاخر درجه لكن لمن يغضب ما يشوف اللي قدامه ((صدق من قال اتق شر الحليم اذا غضب )) بس اول مره اكون انا رغم توتري وغضبي اهدأ منه يمكن لان الضغوط اللي عليه كبيره وفجرها هالموقف



مسكته من كتوفه وضربته عليهم مرتين بخفيف وانا اقول:- هدي هدي اولا من قال لك انها تكلمه في التلفون وثانيا من قال لك انها تكلم شباب في الشوارع (( طالعني بنظره كانه يقول انت وش قاعد تألف)) وثالثا بعدها ما تصير حرمتك علشان تكسر راسها واخيرا انا بروح اجيب مفاتيح المجلس ولا ناوي نحترق من الشمس لمن يجي الرجال



تركته ورحت دقيت جرس البيت بطلت لي الباب عقب ما سالت من على الباب كنت ناوي ان اعطيها المفتاح واهاوشها لان اللي قاله خالد كان يدور في مخي بس مهما يكون ما ارضى احد يتكلم على اختي كذا بس مجرد ما شفت وجهها الشبيه بوجه وداد احلى واهدأ خواتي ما ادري شلون فكرت انه من المستحيل هالبنت تسوي اللي احنا نفكر فيه فسألتها عن مفتاح المجلس وضحكتني حركتها انها نست نفس حركة سعاد و شوي بس الا وهي ردت من الباب اللي دخلت منه كانت شبه تركض ولمن وصلت قالت لي بابتسامه


:- هذا مفتاح الباب الخارجي والباب الداخلي مفتاحه موجود في الباب من داخل بس شوي وبدق عليك اجيب لكم شي تشربونه على ما يوصل جدي..... ما بيتاخر كل ها خمس دقايق ويجي




اخذت المفاتيح ودخلنا انا وخالد المجلس اللي رغم قدمه وصغره بالنسبه لمجلسنا لكنه نظيف ومرتب وريحته حلوه الظاهر شغالتهم تشتغل بضمير


مو مثل شغالاتنا لو ما امي وراهم ما سوو شي عدل توعيت من افكاري على صوت خالد يقول وفي عيونه نظره غضب وحيره



:- يعني بنت تطلع لحالها وترد لحالها في هالوقت وجدها ولا هو هنا وين تروح ؟؟؟؟؟؟؟؟؟



وقبل ما ارد عليه دخل علينا رجال كبير في السن شيباته غازيه لحيته وعاطتنه هيبه فوق هيبته ونور الايمان يطل من وجهه وبابتسامه سلم وقال بعد ما رحب :-سامحوني يا عيالي ما توقعت ان مشوار بو عيسى بيطول ....



رد عليه خالد بابتسامه دافيه ونظرته تقول ان هالرجال دخل قلبه ونال احترامه وهذا كان احساسي بعد:- ما عليك قصور يا ابو محمد وترى احنا اللي جينا بدري ومن غير ما نتصل عليك



ابتسم ابو محمد دليل ان كلام ومنطق خالد اعجبه وقال :- تسلم يا ولدي الا ما قلتو لي من فيكم طلال



واحنا نعرفه عن انفسنا دق الباب الداخلي للمجلس تو ابو محمد بيقوم بس انا اشرت عليه يقعد وقلت له :- استريح يبه انا بشوف وش يبون



رحت للباب لقيت علياء لابسه جلال وحامله في ايدها صينيه فيها عصيرات بارده مع مويه شكلها استغربت اني طلعت لها اخذت منها الصينيه على طول لفت بترجع للباب اللي جت منه وشكله الباب الخارجي لمطبخهم بس انا وقفتها وخليتها تلتفت لي لمن قلت



:- علياء... على الساعه ثنتين لازم نكون في المطار لان رحلتنا على الثلاث


نزلت راسها تطالع الارض وقالت :- شناطي جاهزه واغراض ابوي بعد ((رفعت راسها ناظرتني وكملت)) على جذي بروح انجب لكم الغدا علشان يمديكم تاكلون لقمتين



بعد ما لزم علينا ابو محمد نتغدا عنده اكلنا وعقب ما شربنا الشاي قلت


:- يلا يبه صار لازم نشوف لنا تكسي يودينا المطار



رد ابو محمد بابتسمه هادئه :- وليش التكسي يبه ما دام سيارة علياء موجوده نروح فيها



قلت باعتراض :- بس يبه (( وما ادري ليش صرت اناديه يبه يمكن للراحه اللي يبعثها بنفسك لمن تجلس معه ويمكن لانه جد اختي واللي رباها.... ما كذب خالد انا حساس جدا تجاه خواتي وكاني امهم احب اقعد معهم واسمع منهم وهذا اللي مخلني اعرف كل وحده فيهم وشلون تفكر


ومخلني احس بمسؤليه تجاهم وكاني ابوهم... رغم ان امي وابوي مو مقصرين معهم ... المهم اني كملت)) من بيرد السياره هنا



ابو محمد وهو يومئ براسه :- ما عليك محمد بياخذها من مواقف المطار هو عنده نسخه من سويجها



وقف خالد وقال :- اجل يلا توكلنا على الله



وعقب ما حطينا الشنط في صندوق السيارة اصر خالد انه هو اللي يسوق وطبعا في هالحاله انتظرت ابو محمد يختار وين يركب وركب ورى بحجه ان علياء مو متعوده علي وما بقى لعلياء الي كانت تقفل الباب الا انها تجلس ورى خالد



خــــــــــــالد


ما ادري ليش اصريت اني اسوق سيارتها وكاني بعرفها من خلال سيارتها او كأني بعرف وين تروح بسيارتها او وين كانت او يمكن


علشان اغايضها لاني اعرف ان البنات او على الاقل خواتي ما يحبون احد يلمس او يستخدم اشيائهم لفت نظري علاقة المفاتيح كانت على شكل جوتي رياضه بخيوط ومعلقه على المرايه دبدوب صغير وقران في علبه خشبيه صغيره ما ادري ليش ضبطت المرايه الاماميه علشان اشوفها ولمن التقت عيوني بعيونها ناظرتها بنضره تحمل غضب وقهر


حست فيني ونزلت راسها ومن غير سبب ارتحت انها نزلت عينها



ما صدقت اننا وصلنا مطار الرياض واخيرا بنزل هالحمل عن اكتافي


الشهادة لله اني احترمت جدها حبيته وارتحت له بس هي بالعكس كرهتها اكثر لانها من اول لحظه شفتها فيها حركت بداخلي مشاعر كثيره وكلها سلبيه غضب وحقد وغيره لا يروح فكركم بعيد ترى هالغيره غيره على محارمي مو هي بنت عمي........ التفت لها تمشي ورانا وريحني انها غطت وجهها من وصلنا مطار البحرين الظاهر جدها نبهها لهشي


بس وانا التفت شفت شباب ورانا فعلى طول قلت لطلال



:- طلال خلك جنب اختك



التفت طلال وشاف الشباب وراها على طول راح جنبها بعد مارمى الشباب بنظرة تهديد رغم انهم ما صدر منهم أي تصرف مسيئ


وهالمره طلبت من تركي اني اسوق وما اهتميت باحتجاجه وهالمرة لاني حسيت اني لازم انشغل بشي لان افكاري ما تفارق العبايه اللي وراي وهالمره جلست ورى جدها وطلال وطبعا تركي جلس معي قدام



علــــــــــــــياء



عرفت في طريقنا للمطار ان الشاب الثاني اسمه خالد والشبه اللي بينه وبين طلال يقول انه هو ايه اكيد بيشبهه مو ابوتهم اخوان وامهاتهم بنات خاله ما ادري ليش صابتني رجفه لمن فكرت انه في يوم بيكون هذا الرجال الجامد صاحب النظره المخيفه الغامضه زوجي رفعت راسي شفته يطالعني من المنظره بنظره تشبه اللي شفتها عند باب البيت نزلت راسي ما ابي اشوف هالنضره غير اني ما احب احد يبحلق فيني شلون عاد لو كان رجال ومو أي واحد هذا خالد صاحب النضره الجليديه الخاليه من المشاعر طول ما انا معهم وهو بس مستمع ما يتكلم ما حبيت اني اشوفه او يشوفني علشان جذي لبست الغشوه وغطيت وجهي قبل ما ننزل مطار البحرين ............. وفي المطار والطائرة شغلت نفسي بقصه وفعلا عقب كم صفحه اندمجت ونسيت خالد ........... لكن في السياره عند وصولنا الرياض رجعت لي افكاري كان على عكس البحرين كان طول الطريق يتكلم عن مشاريع وشغلات ما افهمها مع اخوه تركي ((عرفته لانهم عرفوه على جدي)) صوته كان شي ثاني كان عميق وهادئ يوحي انه شخص واثق من نفسه واسلوبه يقول ان كلمته وحده لا تناقش واضح انه معتد بنفسه ......... ومبين من كلامهم انه صاحب


مركز وراي مسموع في شغلهم صحيت من افكاري على صوت جدي يناديني


:- علياء



قلت بهمس مسموع :- امر يبه



ابتسم بحنيه وقال :- ما يامر عليش عدو بس اقول يبه ترى بنروح بيت ابوش ((تنهد )) الله يهديه ابو طلال ما رضى انزل بفندق (( كمل وكانه عارف وش بقول)) وانا ما ردني عنه الا اني ما اقدر اقعدش في فندق وبيت ابوش موجود



سكتني ما قدرت ارد عليه غير ان وجود الشباب منعني من اني اقول أي كلمه وظليت طول الطريق افكر شلون بيستقبلوني اهل ابوي ؟؟؟؟؟؟؟؟؟؟؟؟؟



ياترى وشلون راح يكون الاستقبال؟


علياء وش ردة فعلها وشعورها؟


وش تتوقعون انه يصير؟


مع اعذب وارق التحايا

 
 
رد مع اقتباس
 
 
   
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة








الساعة الآن 04:03 PM.


Powered by vBulletin Version 3.8.2
Copyright ©2000 - 2018, Jelsoft Enterprises Ltd
Translation by Support-ar
منتديات بال مون - منتديات رومانس مون
  PalMoon.net