صفحة بال مون على الموقع التواصل الاجتماعي فيسبوك

العودة   منتديات بال مون > منتدى الفن والأدب > منتدى الفن والادب العام > كتابات سحر فوزى






الرجاء استخدام خاصية البحث أدناه للبحث في الموقع:






إضافة رد
 
أدوات الموضوع إبحث في الموضوع انواع عرض الموضوع
  #1  
قديم 31-01-2013, 01:20 PM
:: رومانس مون جديد ::
______________
View سحر فوزى's Photo Album  سحر فوزى غير متواجد حالياً
 
وصفة سهلة ؟!



وصفة سهلة ؟
ماتعرفش يا صديقى إزاى أقدر أوصل زى اللى وصلوا دول؟ رد عليه صديقه قائلا: الوصفة سهلة جدا .. إنت تخرج من بيتك ..وتنزل الشارع .. وتمشى ورا أى مظاهرة تقابلك.. تهتف زى ما بيهتفوا ..وتعمل زى ما بيعملوا ...ولو لقيتهم إعتصموا .. ما تكدبش خبر.. إعتصم زيهم .. ولو عايز توصل بسرعة ..إركب الموجة .. وعليك بالفضائيات .. وما أدراك ما الفضائيات .. أول ما تلمح كاميرا جاية من بعيد.. إجرى عليها.. و إخطف الميكروفون ، إتكلم ، و زعق ، وصرخ ، وقول كل اللى سمعته من حواليك .. بس زود عليه.. شوية شعارات رنانة .. على حبة تصريحات ، وتهديدات ، وشروط .. وما أوصيكش بالإعتراضات.. كتر منها على قد ما تقدر .. لغاية لما البلد تولع .. ولو سألوك إنت مين ؟ قول لهم إنك (ناشط حقوقى أو سياسى) ... وعنها تروح مشترى لك بدلة .. وكرفته .. وتسشور شعرك .. حتلاقيهم بيتصلوا بيك ، وبيدوروا عليك ياخفيف.. وحيخلوك تقدم برامج توك شو.. وتشتهر، وتبقى نجم .. بعدها تأجر لك شقة تعملها مقر .. وتجيب سكرتيرة زى القمر .. و تجمع لك شوية توكيلات من الشباب.. اللى مش لاقى شغل ياولداه.. بعد ما توعدهم بتوفير شغلانة عال العال .. ومرتب ولا فى الخيال .. وعضوية فى النقابات .. ورعاية صحية ، وأبونيه فى الأتوبيسات .. وتقعد تمشورهم وتصدرهم فى الكبيرة ، والصغيرة .. وتتكبر عليهم .. وتذلهم ، وهم طبعا حيستحملوك علشان إنت وعدتهم... ولما تجهز كل شئ.. تعلن تكوينك لحزب معارض.. أو تابع لتيار معين .. ده حسب إحتياج السوق ، والتساهيل طبعا .. وتسميه إسم مشعلل كده .. وتصدر لك جريدة حزبية معارضة.. وتبقى إنت الصبح رئيس الحزب ، ورئيس التحرير ... و الضهر ضيف فى البرامج .. كل ما نقلب قناة نلاقيك فى خلقتنا ... و فى المساء والسهرة مذيع .. ولو أمكن إشترى لك فضائية تمليك .. عشان تاخد راحتك ، وترحرح فى الكلام .. والدنيا تزهزه لك يا حلو .. وتمطر عليك التمويلات الأجنبية ، والإعانات الخارجية .. تأخدها فى الخباثة ، ولا مين شاف ، ولا مين درى.. واللى يسألك من أين لك هذا ؟ ... تقول له أصل المرحوم بابا عقبال أملتك كان غنى قوى... وساب لى بلاوى متلتلة ... وبعد كده توسع نشاطك ، وترشح نفسك فى أى مجلس تلاقيه قدامك .. وتاخد لك مقعد .. تقعد عليه تحت القبة .. وتمسك الميكروفون ، وتزعق وتقول : لازم نقضى على الفساد .. ونعرف مين اللى بيمول الجمعيات الأهلية ، و الجماعات الإسلامية، والأحزاب اللى ملت البلد ديه .. وإوعى تهدا مهما يحاولوا يهدوك .. علشان تقدر توصل للكرسى الكبير.. ده لو عرفت تأوم اللى قاعد عليه .. وقتها إبقى قابلنى ياشاطر ؟!

بقلم / سحر فوزى / كاتبة وقاصة مصرية / 31 /1 / 2013

 
 
رد مع اقتباس
 
 
   
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة








الساعة الآن 12:56 PM.


Powered by vBulletin Version 3.8.2
Copyright ©2000 - 2017, Jelsoft Enterprises Ltd
Translation by Support-ar
منتديات بال مون - منتديات رومانس مون
  PalMoon.net